मध्यप्रदेशातील सागर जिल्ह्यातून सत्ताधारी भाजप आमदाराच्या मुलीच्या दहशतीचा एक धक्कादायक प्रकार समोर आला आहे. देवरी विधानसभा मतदारसंघाचे भाजप आमदार बृजबिहारी पटेरिया यांची मुलगी प्रियांका पटेरिया हिने एका तरुणाला भररस्त्यात गाठून त्याला शिवीगाळ करत जोत्याने मारहाण केल्याचा आरोप झाला आहे. या घटनेचा व्हिडिओ सोशल मीडियावर प्रचंड व्हायरल झाला असून राजकीय वर्तुळात मोठी खळबळ उडाली आहे.
काय आहे नेमकी घटना?
ही घटना १३ एप्रिल रोजी गौरझामर पोलीस ठाण्याच्या हद्दीतील एका बँकेसमोर घडली. पीडित तरुण राजेश शर्मा याने दिलेल्या माहितीनुसार, तो सोमवारी बँकेत काही कामासाठी गेला होता. यावेळी कारमध्ये बसलेल्या प्रियांका पटेरियाने त्याला बाहेर बोलावले. राजेश कारजवळ पोहोचताच प्रियांकाने त्याला अर्वाच्च भाषेत शिवीगाळ करण्यास सुरुवात केली. जेव्हा त्याने याचे कारण विचारले, तेव्हा प्रियांकाने कारमधून उतरून त्याला जोत्याने मारहाण केली. “तू माझ्या वडिलांविरुद्ध काम करतोस, तुझी इतकी हिंमत कशी झाली?” असे म्हणत तिने राजेशला मारहाण केल्याचा आरोप तक्रारीत करण्यात आला आहे.
सीसीटीव्हीमध्ये कैद झाला प्रकार
मारहाणीचा हा सर्व प्रकार बँकेच्या बाहेर लावण्यात आलेल्या सीसीटीव्ही कॅमेऱ्यात कैद झाला आहे. या फुटेजमध्ये आमदाराची मुलगी तरुणाला मारहाण करताना स्पष्टपणे दिसत आहे. हा व्हिडिओ समोर आल्यानंतर पोलिसांनी तपासाची चक्रे फिरवली आहेत. मात्र, पीडित राजेश शर्माने असा आरोप केला आहे की, आरोपी ही सत्ताधारी आमदाराची मुलगी असल्याने पोलीस कारवाई करण्यास टाळाटाळ करत आहेत.
कौटुंबिक वादाची किनार?
राजेश शर्मा हा आमदार बृजबिहारी पटेरिया यांचा पुतण्या आणि जनपद अध्यक्ष प्रतिनिधी विनीत पटेरिया यांचा जवळचा सहकारी मानला जातो. पटेरिया कुटुंबात गेल्या अनेक दिवसांपासून अंतर्गत कलह आणि कौटुंबिक वाद सुरू असल्याचे समजते. याच वादातून प्रियांकाने राजेशला लक्ष्य केल्याची चर्चा स्थानिक पातळीवर सुरू आहे.
पोलीस काय म्हणतात?
गौरझामर पोलिसांनी याप्रकरणी लेखी तक्रार प्राप्त झाल्याचे मान्य केले आहे. “आम्हाला मारहाणीचा अर्ज मिळाला आहे. सीसीटीव्ही फुटेज आणि पुराव्यांच्या आधारे तपास सुरू असून, योग्य ती कायदेशीर कारवाई केली जाईल,” असे आश्वासन पोलिसांनी दिले आहे. मात्र, अद्याप याप्रकरणी एफआयआर (FIR) दाखल झाला आहे की नाही, याबाबत अधिकृत माहिती मिळू शकलेली नाही.