आशिया कप 2023 मध्ये पाकिस्तानी संघाने नेपाळविरुद्धच्या पहिल्या सामन्यात मोठा विजय मिळवला. त्याचवेळी टीम इंडिया विरुद्ध पाकिस्तानचा दुसरा सामना पावसामुळे अनिर्णित राहिला. एकीकडे पाकिस्तानचा संघ आशिया चषक स्पर्धेत चमकदार कामगिरी करत आहे, तर दुसरीकडे त्यांच्या संघातील एका दिग्गज खेळाडूने क्रिकेटमधून निवृत्ती जाहीर केली आहे.
पाकिस्तानचा वेगवान गोलंदाज सोहेल खान याने रविवारी आंतरराष्ट्रीय आणि प्रथम श्रेणी क्रिकेटमधून निवृत्तीची घोषणा केली परंतु तो देशांतर्गत व्हाईट-बॉल स्पर्धा आणि फ्रँचायझी-आधारित लीगमध्ये खेळणे सुरू ठेवेल. 39 वर्षीय मलाकंदच्या खेळाडूची आंतरराष्ट्रीय क्रिकेट कारकीर्द 2008 ते 2016 अशी होती. या काळात त्याने पाकिस्तानसाठी 9 कसोटी, 13 एकदिवसीय आणि 5 टी-20 सामने खेळले. खानने कसोटीत 27, एकदिवसीय सामन्यात 19 आणि टी-20 फॉरमॅटमध्ये 5 बळी घेतले.
After a thorough consultation with my close ones, I’ve decided to retire from International & First Class Cricket.
Big thank you to PCB, my family, coaches, mentors, teammates, fans, and everyone who supported me. 🙏
I would continue playing domestic white ball & franchise 🏏 pic.twitter.com/yb8daW6mEx
— Sohail Khan (@iSohailKhanPak) September 3, 2023
अॅडलेडमध्ये 2015 च्या आयसीसी विश्वचषकाच्या पूल सामन्यात सोहेलने भारताविरुद्ध पाच विकेट घेतल्या होत्या. मात्र या सामन्यात विराट कोहलीच्या 107 धावांच्या जोरावर टीम इंडियाने पाकिस्तानविरुद्धचा सामना सहज जिंकला. जवळच्या लोकांशी चर्चा करून सोहेलने सोशल मीडियावर निवृत्तीची घोषणा केली.
त्याने ट्विटरवर लिहिले की, मी आंतरराष्ट्रीय आणि प्रथम श्रेणी क्रिकेटमधून निवृत्ती घेण्याचा निर्णय घेतला आहे. पीसीबी, माझे कुटुंब, प्रशिक्षक, मार्गदर्शक, संघातील सहकारी, चाहते आणि मला पाठिंबा देणाऱ्या सर्वांचे मनःपूर्वक आभार.