2019 ते 2021 दरम्यान देशात 13.13 लाख मुली आणि महिला बेपत्ता, ‘या’ राज्यातून सर्वाधिक

2019 ते 2021 या तीन वर्षांच्या कालावधीत देशात 13.13 लाख मुली आणि महिला बेपत्ता झाल्या आहेत, त्यापैकी सर्वाधिक मध्य प्रदेशातील आहेत. हरवलेल्या महिलांच्या संख्येत पश्चिम बंगाल दुसऱ्या क्रमांकावर आहे. केंद्रीय गृह मंत्रालयाने गेल्या आठवड्यात संसदेत सादर केलेल्या आकडेवारीनुसार, 2019 ते 2021 या काळात 18 वर्षांपेक्षा जास्त वयाच्या 10,61,648 महिला देशातून बेपत्ता झाल्या आहेत, तर 18 वर्षांपेक्षा जास्त वयाच्या 2,51,430 मुली या काळात बेपत्ता झाल्या आहेत.

नॅशनल क्राइम रेकॉर्ड ब्युरो (NCRB) ने ही आकडेवारी संकलित केली आहे. संसदेने दिलेल्या आकडेवारीनुसार 2019 ते 2021 दरम्यान मध्य प्रदेशातून 1,60,180 महिला आणि 38,234 मुली बेपत्ता झाल्या आहेत. याच कालावधीत पश्चिम बंगालमधून 1,56,905 महिला आणि 36,606 मुली बेपत्ता झाल्या आहेत. आकडेवारीनुसार, 2019 ते 2021 या काळात महाराष्ट्रातून 1,78,400 महिला आणि 13,033 मुली बेपत्ता झाल्या आहेत.

ओडिशात, तीन वर्षांच्या कालावधीत 70,222 महिला आणि 16,649 मुली बेपत्ता झाल्या, तर छत्तीसगडमध्ये, याच कालावधीत 49,116 महिला आणि 10,187 मुली बेपत्ता झाल्या. संसदेत सादर केलेल्या आकडेवारीनुसार, दिल्ली केंद्रशासित प्रदेशात अव्वल आहे, जिथे सर्वाधिक महिला आणि मुली बेपत्ता झाल्या आहेत. 2019 ते 2021 दरम्यान राष्ट्रीय राजधानीतून 61,054 महिला आणि 22,919 मुली बेपत्ता झाल्या आहेत. जम्मू-काश्मीरमध्ये या कालावधीत 8,617 महिला आणि 1,148 मुली बेपत्ता झाल्या आहेत.

सरकारने संसदेत माहिती दिली की लैंगिक गुन्हे रोखण्यासाठी फौजदारी कायदा (सुधारणा) कायदा- 2013 लागू करण्यासह देशभरातील महिलांच्या सुरक्षेसाठी पावले उचलली आहेत. सरकारने सांगितले की, फौजदारी कायदा (सुधारणा) कायदा-2013 लागू करण्यात आला आहे, ज्यामध्ये 12 वर्षांपेक्षा कमी वयाच्या मुलीवर बलात्कार करण्यासाठी फाशीच्या शिक्षेसह इतर कठोर तरतुदी आहेत.