आधी वार, मग पेट्रोल आणि आग; बांगलादेशात कट्टरपंथीयांचे तांडव सुरूच, हिंदू व्यक्तीवर जीवघेणा हल्ला

बांगलादेशात गेल्या काही दिवसांपासून सुरू असलेला हिंसाचार थांबण्याचे नाव घेत नाहीये. या अराजकतेमध्ये हिंदू समुदायाला सातत्याने लक्ष्य केले जात असून, आता एक अत्यंत अंगावर काटा आणणारी घटना समोर आली आहे. कट्टरपंथीयांच्या एका हिंसक जमावाने एका हिंदू व्यक्तीवर प्रथम धारदार शस्त्रांनी वार केले आणि त्यानंतर अत्यंत निर्घयपणे त्याला जिवंत जाळण्याचा प्रयत्न केला. या घटनेमुळे संपूर्ण जगभरातून संताप व्यक्त केला जात आहे.

नेमकी घटना काय?

मिळालेल्या माहितीनुसार, ही धक्कादायक घटना ३१ डिसेंबर रोजी बांगलादेशातील शरियतपूर जिल्ह्यात घडली. ५० वर्षीय खोकन चंद्र दास हे आपल्या घरी जात असताना दबा धरून बसलेल्या हिंसक जमावाने त्यांच्यावर हल्ला केला. जमावाने आधी त्यांना धारदार शस्त्रांनी जखमी करून रक्ताच्या थारोळ्यात पाडले. एवढ्यावरच न थांबता, नराधमांनी त्यांच्या अंगावर पेट्रोल ओतून त्यांना आग लावून दिली. सध्या खोकन दास यांची प्रकृती अत्यंत चिंताजनक असून, या कृत्याने बांगलादेशातील हिंदूंच्या सुरक्षेचा प्रश्न पुन्हा एकदा ऐरणीवर आला आहे.

हिंदूंवरील हल्ल्यांची भीषण मालिका

गेल्या काही दिवसांतील ही चौथी मोठी घटना आहे. १८ डिसेंबर रोजी दिपू चंद्र दास या तरुणाची मैमनसिंह येथे हत्या करून त्याचा मृतदेह झाडाला लटकवून जाळण्यात आला होता. त्यानंतर २४ डिसेंबर रोजी अमृत मंडल नावाच्या २९ वर्षीय तरुणाची जमावाने बेदम मारहाण करून हत्या केली. तसेच मयमनसिंहमधील एका कापड कारखान्यात हिंदू कामगाराची गोळ्या झाडून हत्या करण्यात आल्याचेही वृत्त समोर आले होते. या घटनांची मालिका पाहता, तेथील हिंदू समाज सध्या अत्यंत दहशतीच्या छायेखाली वावरत आहे.

भारतातून तीव्र पडसाद आणि आंतरराष्ट्रीय चिंता

बांगलादेशातील या अत्याचाराच्या घटनांचे तीव्र पडसाद भारतात उमटत आहेत. महाराष्ट्रासह भारतातील अनेक प्रमुख शहरांमध्ये या हिंसाचाराविरोधात मोठे मोर्चे काढले जात आहेत. अनेक भारतीय नेत्यांनी या घटनेचा तीव्र निषेध केला असून, भारत सरकारने कूटनीतिक पातळीवर हस्तक्षेप करून बांगलादेशातील हिंदूंच्या संरक्षणाची खात्री करावी, अशी मागणी केली आहे. कट्टरपंथीयांच्या या वाढत्या प्रभावामुळे केवळ बांगलादेशच नव्हे, तर संपूर्ण दक्षिण आशियातील शांततेला धोका निर्माण झाल्याची भीती व्यक्त केली जात आहे.