Babar Azam: बाबर आझमनं मोडला विराटचा आणखी एक विक्रम, बनला सर्वात जलद 10,000 धावा करणारा आशियाई फलंदाज
पाकिस्तान क्रिकेट संघाचा कर्णधार बाबर आझम (Babar Azam) याचे भारताचा माजी कर्णधार विराट कोहलीसोबत (Virat Kohli) चांगले संबध असू शकतात, पण हे सर्व मैदानाबाहेर आहे. मैदानात उतरताच बाबरचे लक्ष्य नेहमीच विराट कोहलीच्या रेकॉर्डवर असते. बाबर आझम सातत्याने विराट कोहलीच्या खराब फॉर्मचा फायदा घेत त्याचे विक्रम मोडीत काढत आहे. यावेळीही असेच काहीसे घडले आहे. बाबरने कोहलीचा एक मोठा विक्रम मोडला आणि सर्वात जलद 10,000 आंतरराष्ट्रीय धावा करणारा तो आशियातील पहिला क्रिकेटपटू ठरला आहे.
बाबरने श्रीलंकेविरुद्धच्या गॉल कसोटीमध्ये ही कामगिरी केली. खरे तर, आंतरराष्ट्रीय क्रिकेटच्या तिन्ही फॉरमॅटमध्ये (कसोटी, एकदिवसीय, टी20) सर्वात कमी 228 डावांमध्ये 10,000 धावा करणारा बाबर हा आशियातील पहिला क्रिकेटपटू ठरला आहे. यात त्याने कोहलीचा विक्रम मोडला. कोहलीने 232 डावात ही कामगिरी केली. यासोबतच दिग्गज सुनील गावस्कर, सौरव गांगुली आणि जावेद मियांदाद यांनाही बाबरने मागे टाकले आहे.
आंतरराष्ट्रीय क्रिकेटमध्ये सर्वात जलद 10,000 धावा पूर्ण करण्याचा विक्रम वेस्ट इंडिजचा माजी महान फलंदाज व्हिव्हियन रिचर्ड्सच्या नावावर आहे. त्याने 206 डावात हे स्थान गाठले. रिचर्ड्सनंतर दक्षिण आफ्रिकेचा माजी क्रिकेटर हाशिम आमला (217 डाव), वेस्ट इंडिजचा ब्रायन लारा (220 डाव) आणि जो रूट (222 डाव) यांचा क्रमांक लागतो.
सर्वात जलद 10,000 धावा करणारे आशियातील टॉप-5 क्रिकेटपटू
- बाबर आझम : 228 डाव
- विराट कोहली : 232 डाव
- सुनील गावस्कर : 243 डाव
- जावेद मियांदाद: 248 डाव
- सौरव गांगुली : 253 डाव