गेल्या दशकात रविचंद्रन अश्विन आणि रवींद्र जडेजा या जोडीने टीम इंडियासाठी अनेक सामने जिंकले आहेत. या दोन फिरकीपटूंसमोर जगातील मोठे फलंदाजही टिकू शकत नाहीत. वेस्ट इंडिजविरुद्धच्या पहिल्या कसोटीत या दोन्ही गोलंदाजांनी एकूण 17 विकेट घेतल्या. त्याचबरोबर ही फिरकी जोडी दुसऱ्या कसोटीतही चांगली कामगिरी करत आहे. अश्विन आणि जडेजाने शानदार करिष्मा करत कसोटी क्रिकेटमध्ये मोठे स्थान मिळवले आहे. त्याबद्दल जाणून घेऊया.
अश्विन-जडेजाने या क्लबमध्ये प्रवेश केला
रविचंद्रन अश्विन आणि रवींद्र जडेजा ही जोडी कसोटी क्रिकेटमध्ये एकत्र खेळताना 500 बळी घेणारी देशातील दुसरी जोडी ठरली आहे. त्रिनिदाद कसोटीच्या चौथ्या दिवशी अश्विनने वेस्ट इंडिजच्या दोन विकेट घेत ही कामगिरी केली. या स्टार फिरकीपटूने क्रेग ब्रॅथवेट आणि कर्क मॅकेन्झी यांच्या विकेट घेत 500 चा जादुई आकडा गाठला. अश्विन-जडेजाआधी हरभजन सिंग आणि अनिल कुंबळे या जोडीलाच भारतासाठी 500 विकेट्स घेता आल्या होत्या.
हरभजन सिंग आणि अनिल कुंबळे यांनी 1990 आणि 2000 च्या दशकात विरोधी फलंदाजांवर वर्चस्व गाजवले आणि एकत्रितपणे 501 विकेट घेतल्या, कुंबळेने 281 आणि हरभजनने 220 विकेट घेतल्या. आता अश्विन आणि जडेजा या दोघांच्या क्लबमध्ये दाखल झाले आहेत. 500 विकेट्समध्ये अश्विनच्या नावावर 274 आणि जडेजाच्या नावावर 226 विकेट्स होत्या.
भारताकडून सर्वाधिक बळी घेणारी गोलंदाजी जोडी:
54 कसोटीत 501 – अनिल कुंबळे (281) आणि हरभजन सिंग (220)
49 कसोटीत 500 – आर अश्विन (274) आणि रवींद्र जडेजा (226)
42 कसोटीत 368 – बिशन बेदी (184) आणि बीएस चंद्रशेखर (184)
भारताला विजयासाठी 8 विकेट्सची गरज
सामन्याच्या चौथ्या दिवशी भारतीय फलंदाजांनी चमकदार कामगिरी केली. भारतीय खेळाडूंनी धडाकेबाज फलंदाजी करत वेस्ट इंडिजला विजयासाठी 365 धावांचं लक्ष्य दिलं, त्याला प्रत्युत्तरात विंडीज संघाने 2 गडी गमावून 76 धावा केल्या आहेत. भारताला विजयासाठी 8 विकेट्सची गरज आहे. त्याचबरोबर वेस्ट इंडिजला विजयासाठी 289 धावांची गरज आहे.