दिग्गज क्रिकेटपटू सचिन तेंडुलकरचा मुलगा अर्जुन तेंडुलकर दीर्घ प्रतीक्षेनंतर यंदाच्या आयपीएलमध्ये मुंबई इंडियन्सकडून खेळताना दिसला. अर्जुनची कामगिरी चांगली होती. या खेळाडूला पुन्हा एकदा खेळताना पाहण्यासाठी चाहते उत्सुक आहेत आणि त्यांची प्रतीक्षा आयपीएल 2024 पूर्वी संपणार आहे. आगामी देवधर ट्रॉफीसाठी अर्जुनचा दक्षिण विभागीय संघात समावेश करण्यात आला आहे.
पुद्दुचेरी येथे 24 जुलैपासून होणार्‍या देवधर करंडक या 50 षटकांच्या स्पर्धेसाठी मयंक अग्रवालच्या नेतृत्वाखालील दक्षिण विभागीय संघात अर्जुन तेंडुलकरची निवड करण्यात आली आहे. 13 ते 23 जुलै दरम्यान कोलंबो येथे होणाऱ्या इमर्जिंग आशिया कपमध्ये खेळणाऱ्या बी साई सुदर्शनला स्टँडबाय खेळाडू म्हणून निवडण्यात आले आहे.
डावखुरा वेगवान गोलंदाज आणि खालच्या फळीतील फलंदाज असलेल्या अर्जुनने इंडियन प्रीमियर लीगच्या शेवटच्या हंगामात मुंबई इंडियन्सकडून पदार्पण केले. बीसीसीआयने त्याला ऑगस्टमध्ये उदयोन्मुख ऑलराउंडरच्या शिबिरातही स्थान दिले होते. गोव्याच्या अर्जुन व्यतिरिक्त कर्नाटकच्या विद्वत कावरपा, विजयकुमार विशाक आणि व्ही कौशिक यांना दक्षिण विभागाच्या वेगवान आक्रमणात स्थान मिळाले आहे.
देवधर ट्रॉफीसाठी दक्षिण विभागीय संघ:
मयंक अग्रवाल (कर्णधार), रोहन कुनुमल, एन जगदीसन, रोहित रायुडू, केबी अरुण कार्तिक, देवदत्त पडिक्कल, रिकी भुई, वॉशिंग्टन सुंदर, विद्वत कावेरापा, विजयकुमार विशाक, कौशिक व्ही, रोहित रेडकर, सिजोमन जोसेफ, अर्जुन तेंडुलकर, साई किशोर.