मुंबई – शिवसेनेमध्ये बंड पुकारून पक्ष प्रमुख उद्धव ठाकरेंना मुख्यमंत्री पदावरून पायऊतार व्हावे लागले. एकनाथ शिंदेंनी दिलेल्या या धक्क्यातून शिवसेना सावरत नाही तोच उद्धव ठाकरेंना आणखी एक मोठा धक्का देण्याच्या तयारीत मुख्यमंत्री एकनाथ शिंदे आणि उपमुख्यमंत्री देवेंद्र फडणवीस आहेत.
राज्यपालांनी गेल्या दीड-दोन वर्षांपासून शिवसेना, राष्ट्रवादी आणि काँग्रेसच्या १२ उमेदवारांची यादी विधान परिषद आमदारकीसाठी पाठविली होती. परंतू, राज्यपालांनी त्यावर आक्षेप घेत ही यादी तशीच ठेवली होती. यावरून राज्यातील राजकारण तापलं होतं. राजीनाम्याची घोषणा करताना उद्धव ठाकरेंनी राज्यपालांना लोकशाहीवरून टोमणा मारताना आतातरी १२ आमदारांची यादी मंजुर करावी, असं म्हटलं होतं.
आता शिंदे सरकार स्वीकृत सदस्यांची नवीन यादीच पाठविणार असल्याचे सूत्रांनी सांगितले आहे. राज्य सरकार या १२ आमदारांची नवीन यादी पाठविणार आहे. जुन्या यादीमध्ये भाजपातून राष्ट्रवादीमध्ये गेलेले एकनाथ खडसेंचे नाव होते. ते बंडाचे कारण ठरलेल्या विधान परिषद निवडणुकीमध्ये निवडून आले आहेत. यामुळे खडसेंना विरोध म्हणून राज्यपाल या यादीला विरोध करत आहेत, असा दावा होता, तो देखील आता राहिला नव्हता. तरी देखील शिंदे सरकार आपली नवी यादी पाठविणार आहे.