मुंबई – मनी लॉन्ड्रिंग प्रकरणी 12 तासांच्या चौकशीनंतर सोमवारी ईडीने महाराष्ट्राचे माजी गृहमंत्री अनिल देशमुख यांना अटक केली होती. अनिल देशमुख सध्या 6 नोव्हेंबरपर्यंत ईडीच्या कोठडीत आहेत. चौकशीदरम्यान, अनिल देशमुख यांच्याकडून कोणत्याही प्रश्नांची समाधानकारक उत्तरे न मिळाल्याने त्यांना अटक करण्यात आली.
मनी लाँड्रिंग प्रकरणात महाराष्ट्राचे माजी गृहमंत्री अनिल देशमुख यांच्यावर कडक कारवाई होत आहे. आता अंमलबजावणी संचालनालयाने (ईडी) अनिल देशमुख यांचा मुलगा हृषिकेश देशमुख याला चौकशीसाठी बोलावले आहे. त्याला शनिवारी ईडी कार्यालयात चौकशीसाठी बोलावण्यात आल्याचे सांगण्यात येत आहे. याप्रकरणी तपास यंत्रणेने अनिल देशमुख यांना यापूर्वीच अटक केली आहे.
Maharashtra: ED summons former state Home Minister Anil Deshmukh’s son, Hrishikesh Deshmukh tomorrow for questioning in connection with a money laundering case.
— ANI (@ANI) November 4, 2021
काय आहे प्रकरण ?
मुंबईचे माजी पोलीस आयुक्त परमबीर सिंग यांनी मुख्यमंत्री उद्धव ठाकरे यांना पत्र लिहिले आहे. अनिल देशमुख यांनी गृहमंत्री असताना सचिन वाझे यांच्याकडे दरमहा १०० कोटींची मागणी केल्याचा दावा माजी आयुक्तांनी या पत्रात केला होता. यासोबतच पोलीस अधिकाऱ्यांच्या बदल्या आणि पदस्थापनेच्या बदल्यात पैसे घेतल्याचा आरोपही देशमुख यांच्यावर आहे.
25 फेब्रुवारी रोजी उद्योगपती मुकेश अंबानी यांच्या घराच्या बाहेर स्फोटकांनी भरलेले वाहन आढळले होते. या प्रकरणात मुंबई पोलीस अधिकारी सचिन वाझे यांचे नाव समोर आले होते. यानंतर मुंबईचे तत्कालीन पोलीस आयुक्त परमबीर सिंग यांची महाराष्ट्र सरकारने बदली करून त्यांना होमगार्डचे डीजी बनवले होते. यानंतर परमबीर सिंह यांचे हे पत्र समोर आले.