राजौरी : जम्मू-काश्मीरमध्ये लष्कराच्या जवानांच्या शहीद होण्याचा सिलसिला थांबत नाही आहे. अलीकडेच पुंछमध्ये झालेल्या दहशतवादी हल्ल्यात पाच जवान शहीद झाले होते, त्यानंतर शनिवारी राजौरीमध्ये भीषण अपघात झाला. या अपघातात लष्कराचे दोन जवान शहीद झाले आहेत. शहीद झालेल्या जवानांपैकी एक राजौरीचा तर दुसरा जवान बिहारचा रहिवासी होता.
अधिकार्‍यांनी सांगितले की, नियंत्रण रेषेजवळ डुंगी गाला सेक्टरमध्ये लष्कराच्या रुग्णवाहिकेला तीव्र वळणावर चालकाचे नियंत्रण सुटल्याने अपघात झाला. या अपघातात रुग्णवाहिका चालक आणि एक शिपाई ठार झाल्याचे त्यांनी सांगितले. याआधीही सिक्कीममध्ये गेल्या वर्षी अशाच अपघातात 16 जवानांचा मृत्यू झाला होता.
Two Army personnel killed as force’s ambulance skids off road, plunges into gorge in Jammu and Kashmir’s Rajouri district: Officials
— Press Trust of India (@PTI_News) April 29, 2023
गुरुवार, 20 एप्रिल रोजी जम्मू-काश्मीरमधील राजौरी सेक्टरमधील भिंबर गली आणि पूंछ दरम्यान दहशतवाद्यांनी लष्कराच्या वाहनावर हल्ला केला होता. या हल्ल्यात लष्कराच्या राष्ट्रीय रायफल्सचे 5 जवान शहीद झाले असून 1 जवान गंभीर जखमी झाला आहे. या हल्ल्याची जबाबदारी पीएएफएफ म्हणजेच पीपल्स अँटी फॅसिस्ट फ्रंट या दहशतवादी संघटनेने घेतली आहे. या संघटनेला जैशच्या मोहम्मदचा पाठिंबा असल्याचे सांगण्यात येत आहे.