अहमदाबाद : गुजरातमधील अहमदाबाद शहरात शनिवारी दुपारच्या सुमारास घडलेल्या भीषण आगीच्या दुर्घटनेने संपूर्ण परिसर हादरला. महमूदपुरा भागातील एका फटाका निर्मिती कारखान्यात अचानक आग लागल्याने काही क्षणांतच परिस्थिती नियंत्रणाबाहेर गेली. कारखान्यात मोठ्या प्रमाणावर साठवून ठेवलेल्या फटाक्यांमुळे आग झपाट्याने पसरली आणि स्फोटांच्या मालिकेमुळे परिसरात भीतीचे वातावरण निर्माण झाले. या भीषण दुर्घटनेत आठ जणांचा होरपळून मृत्यू झाला असून 15 हून अधिक जण गंभीर जखमी झाले आहेत.
क्षणार्धात आगीने घेतला रौद्ररूप
प्राथमिक माहितीनुसार, दुपारच्या सुमारास कारखान्यात अचानक आग लागली. आतमध्ये मोठ्या प्रमाणावर ज्वलनशील साहित्य आणि फटाक्यांचा साठा असल्याने काही मिनिटांतच संपूर्ण इमारत आगीच्या भक्ष्यस्थानी पडली. आकाशात उंच उसळणाऱ्या ज्वाळा आणि दाट काळ्या धुरामुळे परिसरातील नागरिकांमध्ये घबराट पसरली. घटनेची माहिती मिळताच अग्निशमन दल, रुग्णवाहिका आणि स्थानिक प्रशासन तातडीने घटनास्थळी दाखल झाले.
आरएएफ जवानांनी सुरू केले तातडीचे बचावकार्य
दुर्घटनास्थळाजवळच रॅपिड ॲक्शन फोर्स (RAF) चे तळ असल्याने जवानांनी सर्वप्रथम घटनास्थळी धाव घेत बचावकार्य सुरू केले. त्यानंतर अग्निशमन दलाने अनेक तासांच्या प्रयत्नांनंतर आगीवर नियंत्रण मिळवले. जखमींना तातडीने जवळच्या रुग्णालयात दाखल करण्यात आले असून काहींची प्रकृती अत्यंत गंभीर असल्याची माहिती समोर आली आहे. त्यामुळे मृतांचा आकडा वाढण्याची शक्यता प्रशासनाने नाकारलेली नाही.
परवाना रद्द असूनही सुरू होता कारखाना
तपासादरम्यान समोर आलेल्या माहितीनुसार, संबंधित फटाका कारखान्याचा परवाना यापूर्वीच रद्द करण्यात आला होता. तरीही नियमांचे उल्लंघन करून तेथे उत्पादन सुरू असल्याचे उघड झाले आहे. हा कारखाना मेहुल डोडिया यांच्या नावावर असल्याची माहिती अधिकाऱ्यांनी दिली. परवाना नसताना धोकादायक स्वरूपाचा व्यवसाय सुरू ठेवण्यात आल्याने संबंधितांवर कठोर कारवाई होण्याची शक्यता आहे.
आगीचे कारण अद्याप अस्पष्ट
अग्निशमन विभागाने आग पूर्णपणे विझवली असली तरी आग नेमकी कशामुळे लागली, याबाबत अद्याप स्पष्ट माहिती मिळालेली नाही. घटनास्थळाची तपासणी सुरू असून तज्ज्ञ पथके पुरावे गोळा करत आहेत. पोलिसांनीही या प्रकरणाचा सखोल तपास सुरू केला असून सुरक्षाविषयक नियमांचे उल्लंघन झाले का, याचीही चौकशी केली जात आहे.
या दुर्घटनेनंतर बेकायदेशीररीत्या सुरू असलेल्या धोकादायक उद्योगांवर नियंत्रण ठेवण्याबाबत प्रशासनाच्या कार्यपद्धतीवर प्रश्न उपस्थित होत आहेत. तसेच अशा कारखान्यांची नियमित तपासणी आणि सुरक्षा नियमांची कठोर अंमलबजावणी करण्याची मागणीही नागरिकांकडून केली जात आहे.