सैन्य भरतीची तयारी करत असलेल्या औरंगाबाद येथील तरुणाने व्हॉट्सअपवर स्टेट्स ठेवून विहिरीत उडी मारुन आत्महत्या केल्याची धक्कादायक घटना समोर आली आहे. ही घटना औरंगाबादमधील बिडकीन एमआयडीसीमध्ये घडली आहे. या घटनेमुळे परिसरात खळबळ पसरली आहे. पोलिसांकडून देण्यात आलेल्यामाहितीनुसार, बिडकीन येथील ओमकार नारायण डांगरे (वय 21 वर्षे) हा तरुण घरी न सांगता सकाळपासून बाहेर होता. रात्री उशिरापर्यंत तो घरी परतला नाही. त्यामुळे आई वडिल यांनी शोधाशोध सुरू केली. सहायक पोलिस निरीक्षक संतोष माने यांनी मोबाईल नंबर वरुन ट्रॅक केले असता मोबाईल नंबरचे लोकेशन डीएम आयसी औद्योगिक वसाहतीत मिळून येत असल्याचे दिसून आले.
पोलिसांनी औद्योगिक वसाहतीमधील सेक्टर क्रमांक 17 मध्ये धाव घेतली तेव्हा विहिरीजवळ ओमकारची गाडी आणि चप्पल नजरेस पडले. सहायक पोलिस निरीक्षक संतोष माने यांनी अग्निशामक दलास पाचारण केले. अग्निशामक दलाच्या जवानांनी 1 तासाचे अथक परिश्रम घेत मृतदेह विहिरीतून बाहेर काढत पोलिसांच्या ताब्यात देण्यात आला. ओमकार डांगरे याने त्याच्या मोबाईलवरील व्हॉट्सअप स्टेटस वर “I just feel like if I died everything will be ok:) ” अशा प्रकारे स्टेटस ठेवत आपले जीवन संपवले.