PIB Fact Check: 500 रुपयांच्या नोटा मार्चपासून बंद होणार? सोशल मीडियावरील अफवांचे पीआयबीने केले खंडन; जाणून घ्या सत्य काय!

नवी दिल्ली: सध्या सोशल मीडियावर ५०० रुपयांच्या नोटेबाबत एक खळबळजनक दावा वेगाने व्हायरल होत आहे. मार्च २०२६ पासून बँकांच्या एटीएममध्ये ५०० रुपयांच्या नोटा मिळणे बंद होणार असल्याची चर्चा या पोस्टमध्ये केली जात आहे. नोटाबंदीच्या जुन्या आठवणी ताज्या झाल्यामुळे सर्वसामान्यांमध्ये चिंतेचे वातावरण निर्माण झाले होते. मात्र, केंद्र सरकारच्या अधिकृत ‘फॅक्ट चेक’ (PIB Fact Check) विभागाने या दाव्याची दखल घेत सत्य समोर आणले आहे. सरकारने अशा कोणत्याही प्रकारचा निर्णय घेतला नसल्याचे स्पष्ट करण्यात आले आहे.

अफवा नेमकी कुठून पसरली?

गेल्या वर्षी केंद्र सरकारने चलनात लहान नोटांचा वापर वाढवण्याबाबत बँकांना काही सूचना दिल्या होत्या. यामध्ये बँकांना असे सुचवण्यात आले होते की, एटीएममध्ये १०० आणि २०० रुपयांच्या नोटांची संख्या वाढवावी, जेणेकरून सुट्या पैशांची टंचाई जाणवणार नाही. सरकारने केवळ लहान नोटांच्या उपलब्धतेवर भर दिला होता. मात्र, सोशल मीडियावरील काही घटकांनी या माहितीचा विपर्यास करून ५०० रुपयांच्या नोटा एटीएममधून पूर्णपणे हटवल्या जाणार असल्याची अफवा पसरवली. प्रत्यक्षात लहान नोटा वाढवण्याचा अर्थ ५०० च्या नोटा बंद करणे असा कधीच नव्हता.

पीआयबी फॅक्ट चेकचा मोठा खुलासा

प्रेस इन्फॉर्मेशन ब्युरोच्या (PIB) फॅक्ट चेक युनिटने या प्रकरणाचा सखोल तपास करून हा दावा पूर्णपणे खोटा आणि निराधार असल्याचे जाहीर केले आहे. सरकारने स्पष्ट केले आहे की, ५०० रुपयांच्या नोटा बंद करण्याची किंवा त्या एटीएममधून बाद करण्याची कोणतीही योजना नाही. “सोशल मीडियावर फिरणारा हा मेसेज केवळ लोकांची दिशाभूल करण्यासाठी पसरवला जात आहे. ५०० रुपयांची नोट हे भारताचे वैध चलन (Legal Tender) आहे आणि ते यापुढेही तसेच राहील,” असे पीआयबीने आपल्या अधिकृत स्पष्टीकरणात म्हटले आहे.

भ्रामक बातम्यांपासून सावध राहण्याचे आवाहन

५०० रुपयांच्या नोटांबाबत अशा अफवा पसरण्याची ही पहिलीच वेळ नाही. यापूर्वीही अनेकदा नोटाबंदीशी संबंधित चुकीचे दावे करण्यात आले होते. सरकारने नागरिकांना आवाहन केले आहे की, व्हॉट्सॲप किंवा फेसबुकवर येणाऱ्या कोणत्याही अप्रामाणिक आणि भ्रामक बातम्यांवर डोळे झाकून विश्वास ठेवू नका. कोणतीही महत्त्वाची माहिती शेअर करण्यापूर्वी ती अधिकृत सरकारी संकेतस्थळावर तपासून पाहावी. सध्या देशात ५०० रुपयांच्या नोटांचा व्यवहार पूर्वीप्रमाणेच सुरू असून त्यात कोणताही बदल करण्यात आलेला नाही.