केरळमध्ये भीषण अपघात, स्कूल बस आणि ऑटोरिक्षा यांच्यात झालेल्या धडकेत 4 महिलांसह 5 जणांचा मृत्यू

केरळमधील कासारगोड जिल्ह्यात सोमवारी संध्याकाळी स्कूल बस आणि ऑटोरिक्षा यांच्यात भीषण टक्कर झाली. हा अपघात इतका भीषण होता की चार महिलांसह पाच जणांचा मृत्यू झाला. पोलिसांनी दिलेल्या माहितीनुसार, अपघातात चार जणांचा जागीच मृत्यू झाला तर ऑटोचालकाचा रुग्णालयात नेत असताना मृत्यू झाला.

स्कूल बस अपघाताबाबत बडियाडका पोलिस स्टेशनच्या अधिकाऱ्याने सांगितले की, प्राथमिक तपासानुसार बसचा वेग जास्त होता आणि चुकीच्या दिशेने येत असल्याने हा अपघात झाला. सायंकाळी साडेपाचच्या सुमारास हा अपघात झाला. पोलिसांनी सांगितले की, बस शाळकरी मुलांना त्यांच्या घरी सोडल्यानंतर परतत होती, त्यामुळे त्यात मुले नव्हती.

ऑटो आणि बसचे मोठे नुकसान

या अपघातात स्कूल बस आणि ऑटोचे मोठे नुकसान झाल्याचे पोलिस अधिकाऱ्याने सांगितले. बस चालक पोलिसांच्या ताब्यात असून, लवकरच याप्रकरणी एफआयआर दाखल करण्यात येईल, असे त्यांनी सांगितले.

या अपघाताबाबत काही स्थानिक लोकांनी टीव्ही चॅनेलला सांगितले की, अपघातानंतर रुग्णवाहिका बोलावूनही तेथे पोहोचण्यास वेळ लागला. प्रशासन दिरंगाई करत असल्याचा आरोप केला. चारही महिला एकाच कुटुंबातील असल्याचे त्यांनी सांगितले.