हरियाणाच्या कर्नालमध्ये भीषण अपघात, राईस मिलची इमारत कोसळल्याने 4 मजुरांचा मृत्यू, 20 जखमी

देश-विदेश
By Team Inside Marathi
WhatsApp Group

हरियाणातील कर्नालच्या तरवाडीमध्ये मंगळवारी पहाटे मोठी दुर्घटना घडल्याचे वृत्त आहे. येथे असलेल्या शिवशक्ती नावाच्या राईस मिलची तीन मजली इमारत कोसळली. अपघाताच्या वेळी इमारतीत अनेक मजूर झोपले होते, ते ढिगाऱ्याखाली दबले गेले. या अपघातात 4 मजुरांचा मृत्यू झाला, तर 20 जण जखमी झाले.

शिवशक्ती मिल असे या राईस मिलचे नाव आहे. मिलच्या या इमारतीत 150 हून अधिक मजूर झोपत असल्याचे सांगण्यात येत आहे. अपघाताची माहिती मिळताच अग्निशमन दल, पोलीस, रुग्णवाहिका आणि सामाजिक संस्था घटनास्थळी पोहोचल्या आणि मदत आणि बचाव कार्यातून मजुरांना ढिगाऱ्याखालून बाहेर काढले.

ही इमारत अचानक कोसळण्यामागील कारण अद्याप समजू शकलेले नाही. पोलीस सध्या गिरणी मालकाची चौकशी करत आहेत. अपघाताची माहिती मिळताच कर्नालचे एसपी शशांक सावनही घटनास्थळी पोहोचले.

मीडियाला या अपघाताची माहिती देताना एसपी सावन यांनी सांगितले की, या इमारतीत एकूण 157 मजूर झोपले होते. सध्या याठिकाणी डेब्रिज हटवण्याचे काम सुरू आहे. या घटनेमागील कारणे शोधण्यासाठी दोन पथके तयार करण्यात येणार असून गिरणी मालकाचीही चौकशी करण्यात येणार आहे.