ISL: इंडियन फुटबॉल लीगमध्ये गोंधळ, सुनील छेत्रीच्या गोलवरून वाद, खेळाडू मैदान सोडून बाहेर

खेळविश्व
By Team Inside Marathi
WhatsApp Group

इंडियन सुपर लीगमध्ये शुक्रवारी बेंगळुरू एफसी आणि केरळ ब्लास्टर्स यांच्यातील सामन्यात कमालीची नाट्यमयता पाहायला मिळाली. श्री कांतीरवा स्टेडियमवर खेळल्या जात गेलेल्या प्लेऑफ सामन्यादरम्यान बेंगळुरू आणि केरळच्या संघांमध्ये भांडण झाले. यानंतर केरळचे खेळाडू विरोध करत थेट सामना मध्यंतरी सोडून मैदानाबाहेर गेले.

सामन्याच्या अतिरिक्त वेळेत ही घटना घडली. बेंगळुरू एफसीचा कर्णधार सुनील छेत्रीच्या गोलवरून हाणामारी सुरू झाली आणि नंतर त्याचे हायव्होल्टेज ड्रामामध्ये रूपांतर झाले. इंडियन सुपर लीगच्या इतिहासात एखाद्या निर्णयाच्या निषेधार्थ संघाने मैदानाबाहेर जाण्याची ही पहिलीच वेळ आहे.

सुमारे अर्ध्या तासानंतर, केरळचे खेळाडू मैदान सोडल्यानंतर, सामना अधिकाऱ्यांनी घोषित केले की सुनील छेत्रीचा गोल योग्य होता आणि बेंगळुरूने सामना 1-0 ने जिंकला. या विजयासह बेंगळुरू संघाने उपांत्य फेरी गाठली. अंतिम चारमध्ये त्यांचा सामना मुंबईशी होणार आहे.

वास्तविक, संपूर्ण घटना सामन्यादरम्यान अतिरिक्त वेळेच्या 98 व्या मिनिटाला घडली. केरळ बॉक्सच्या बाहेरून फाऊल केल्याबद्दल रेफ्रींनी बेंगळुरू संघाला फ्री किक दिली. यानंतर रेफ्रींनी बेंगळुरू संघाला लवकरात लवकर फ्री-किक घेण्यास सांगितले.

रेफरीच्या शिट्टीनंतर केरळचा गोलकीपर आपल्या खेळाडूंना काहीतरी सांगत होता. तोपर्यंत सुनील छेत्रीने किक घेतली आणि चेंडू गोलपोस्टच्या आत गेला. केरळच्या खेळाडूंनी सांगितले की, त्यांचा गोलकीपर तयार नव्हता मग परवानगी कशी मिळाली?

त्याचवेळी रेफ्रींनी त्यांना परवानगी दिल्याचे बंगळुरू संघाने सांगितले. यानंतर केरळचे खेळाडू रेफ्रींसोबत भिडले. केरळच्या प्रशिक्षकाने रेफ्रीशीही बोलून आपल्या खेळाडूंना मैदानाबाहेर बोलावले. यानंतर ते पुन्हा खेळायला मैदानात उतरले नाही.